Do Bheachdan Fhein

Obair Moine

Obair Moine le Iain M. Macleòid "Gus an do thòisich buain na mònach leis a’ machine o chionn glè bheag de bhliadhnachan, cha tàinig mòran caochlaidh air an dòigh anns an robh mòine air a h-àarach airson ùine fhada, a’ riochadh agus a’ gearradh an rùisg leis an spaid agus a’ càradh a’ cheap gu brèagha dòigheil air uachdar a’ chaorain an-uiridh .  Bha a’ mhòine air a gearradh leis an tairsgeir, am barr fhad air a chàradh taobh ri taobh air uachdar a’ phuill."

Dòmhnall Uilleam Dido (DW Gillies) 20 Dail bho Dheas, ‘s Dòmhnall a’ Bhocsair (Donald Campbell), 6b dail bho Dheas, sa mhòine

"Bha fàd a ghàrraidh, ach amhàin an corrfhad, air a thogail le toll tron deidheadh isean, nì a bha a’ cur fìor mhais air an obair nuair bhiodh e dèante gu math.  Bha an caora ann am poll nan trì fòid air a chàradh a cheart cho faiceallach, gach fàd le mhàs a-mach am bràigh a’ phuill.  Ann an beagan sheachdainnean bhathas a’ togail rùdhanan de cheithir fòid agus fear mar  bhonaid os an cionn.  Far an robh droch shamhradh dh’fheumadh i a bhith air a rùdhadh.  ‘S e sin ‘s maite na rùdhanan a bhith air an sgaoileadh agus air an togail air ais, ach beagan nas motha.  Cha bhuineadh dhith tuilleadh gu àm a h-aiseag gu rathad.  Thàinig caochladh nach bu bheag air an seo bho àm a’ chlèibh ach cha leudaich sinn air an sin an tràth seo.

"An dèidh bliadhnachan a chur seachad anns an obair, dè mar a chòrdadh e riut gun cainnte riut nach b’aithne dhut fhathast mòine a thogail!?  Seo mar a thachair dhomhsa agus mi a’ buain poll ri taobh Choinnich Mhòir a bhuineadh do Ghabhsann. 

"Thug e an aire, agus  mi togail rùdhanan mar a chleachd mi le bhith a’ cur taobh fhliuch dhan fhad a-mach robh mi a’ dèanamh na h-obrach anns an dòigh cheairt.  Thàinig e a-null far an robh mi: “Ille,” ars esan, “chan eil thu a’ dèanamh sin ceart.  Cuir an taobh tioram a-mach às an rùdhan."

“'Seadh gu dearbh,' arsa mise agus mi cinnteach gur ann a’ tarraing mo chois a bha e.  'Tarraing an t’èile.'”

"Thòisich e a’ toirt dhomh 'demonstration' agus ga mo theagasg ann a theory tiormachaidh na mònach. Seall ars esan, agus e a’ làimhseachadh fòid a’ bharrfhad  mar a tha a’ ghrian agus a’ ghaot air uachdar na fòid sin a sgàineadh.  Ma chuireas tusa nis a-mach an taobh fliuch às an rùdhan, sgàinidh an taobh sin cuideachd agus aig deireadh an latha cha bhi càil  agam ach caoran.  Dèan thus mar a tha mise ag innse dhut agus bheir thu dhàchaidh  mòine shlàn”.

"Feumaidh mi aideachadh gun do dh’iompaich e mi agus gun do dhearbh mi air mo shon fhìn gur e seo an dòigh cheart air mòine dhubh a thogail.  Fhuair me a-mach an uairsin gu robh feadhainn eile air feadh na sgìre a’ cleachdadh doigh muintir Ghabhsainn, ach tha mi dhan làn bheachd gu ròbh a’ chuid bu mhotha a bha an sàs anns an an obair cho aineolach ‘s a bha m fhìn."